जि अफिसं स्कुटरय् लिहां वया च्वनाबलय्, स्कुटरय् पेट्रोल मरुगु होस दत । पेट्रोल छकः तयेके माल धकाः पेट्रोल पम्पय् लाइन च्वं वना ।
लाइन भचा तःहाकः र बल्ल तल्ल जिगु पाः वल, अले काचा काचा पेट्रोल तयेकाः अले ध्यबा पुलाः छेँय् वनेत पिहां वया । जि जिगु स्कुटर नापं नापं, छगू मेगु बाइक नं ल्यू ल्यू वयाच्वंगु चाल ।
जि गनं गनं वन, अनं अ नं हे वल, जिगु नुगः भारा भारा मिन । जि ग्यानाः स्कुटर झन झन ब्वाका । अले छेँय् वनेगु लँय् मवंसे मेगु लँय् वना । व बाइक नं व हे लँय् वल । जि आः छु यायेगु धकाः बिचाः यायां स्कुटर ब्वाका च्वना ।
व बाइक नं जिं ब्वाकूलिसे, वं नं ब्वाकल अले लँय् जिपिं निम्हेसिगुं रेस जुल । थथें जुया च्वंबलय्, वं बाइकं आः हरन नं न्यायेकल, मदिक हरन बियाः ल्यू ल्यू वल । थ्व ला पक्का हे बाइकं वःम्ह गुन्डा खनिंसा धकाः जि धाःसा झन ग्यात ।
व बाइक छुं ई लिपा ल्यूने मवसे, जिगु स्कुटरया न्ह्यःने हयाः हे बाइक दिकल । आः जितः ला तसकं तं पिहां वल, अले जिं थःगु हेल्मेट त्वःताः हाला ।
“थ्व छु पहः खः ? छाय् जिगु ल्यू ल्यू वयागु ?”, जिं थुलि धाये सिमधःनि, व मनुखं जिगु पर्स जितः वांछ्वया वन । जि उबलय् तिनि झ्वास्स चाल, जिगु पर्स ला पेट्रोल तयेथाय् कुतुं वंगु जुयाच्वन । अले व मनू जिगु ल्यूने च्वंम्हं, जिगु पर्स कयाः जितः लित ब्यू वयाच्वंम्ह खनिं ।
जिं ला अथें हे ग्याका च्वना का । व बाइकं वःम्हं ला भिंम्ह मनू हे जुया च्वन । थ्व लुमंकाः थःत हे न्हिले वल । अले व मनूयात नुगलं निसें सुभाय् बिया, तर व मनू ला वने धुंकल ।
मस्यु व मनू सु खः, तर वं यानाः जिगु ध्यबा जक मखु, लाइसेन्स, ए.ति.एम कार्द व मेगु सामान नं मतन । सुभाय् दु वय्कःयात ।
